Indonesia, kinakapos sa body bags
PALU (AFP) – Halos 1,400 katao na ang kumpirmadong namatay sa quaketsunami na sumalanta sa Sulawesi island ng Indonesia, at nagbabala ang mga opisyal ng United Nations na malawak ang pangangailangan ng survivors at rescue teams na naghahanap pa rin sa mga biktima.
Halos 200,000 katao ang nangangailangan ng agarang tulong, sinabi ng UN humanitarian office, kabilang ang libu-libong bata. Tinatayang 66,000 kabahayan ang sinira o winasak ng 7.5-magnitude na lindol at tsunami na nilikha nito.
Nilalabanan ng survivors ang uhaw at gutom, dahil sa kakulangan ng supply, at nag-umapaw ang mga sugatang pasyente sa mga lokal na ospital. Laganap din ang panloloob sa mga tindahan.
‘’There are still large areas of what might be the worst-affected areas that haven’t been properly reached, but the teams are pushing, they are doing what they can,’’ sinabi ni Jens Laerke, ng UN humanitarian office, sa reporters sa Geneva nitong Martes ng gabi.
Sa bawat paghila ng mga nakaligtas sa ilalim ng mga guho, matatagpuan ang mas marami pang mga bangkay.
‘’The death toll is now 1,374, 113 missing,’’ sinabi ni Willem Rampangilei, pinuno ng Indonesia national disaster agency, sa reporters sa Palu City nitong Martes.
‘’And there are still a few bodies trapped under the rubble. We don’t know how many. Our priority is still to find and save people,’’ idinugtong niya.
Inaasahan ng mga awtoridad na patuloy na tataas ang bilang ng mga namatay ngayong nararating na ng rescuers ang mga lugar na dating hindi maabot.
Sinabi ng Indonesia-based ASEAN Coordinating Centre for Humanitarian Assistance na mas maraming body bags pa ang kailangan, habang tumitindi ang pangamba na ang mga naaagnas na bangkay ay maaaring pagmumulan ng mga sakit.
Pinangungunahan ng Indonesian military ang rescue effort, ngunit matapos mag-alangan na tumanggap ng tulong ni President Joko Widodo tatlong araw matapos ang lindol, mayroon na rin ngayong mga grupo ng international NGOs sa Palu.
Nagsimula na ring bumuhos ang international aid offers simula nang humingi ng tulong ang Jakarta. Kinagabihan ng Martes, sinabi ng UN Central Emergency Response Fund na maglalabas ito ng $15 milyon aid.
Kahapon, ipinahayag ng Australia na magpapadala ito ng medical team sa disaster zone at magkakaloob ng karagdagang $5M aid.
‘’The Government of Indonesia is experienced and well-equipped in managing natural disasters, but sometimes, as with all other countries, outside help is also needed,’’ saad sa pahayag ni Mark Lowcock, ang UN’s Emergency Relief Coordinator.