Gustong maging Diyos, inilibing ang sarili

Iniligtas kamakailan ang isang lalaki sa India mula sa hukay, nang boluntaryo itong magpalibing nang buhay sa loob ng walong oras upang makamit ang “salvation” at muling mabuhay bilang Diyos.

Bago ang insidente, una nang inihayag ni Deeraj Kharol, isang tantrik na ilang taon nang naninirahan sa templo ng Rajasthan, Karocho ka Kheda village, ang plano nitong paglilibing sa sarili nang buhay bilang bahagi ng kakaibang ritwal upang makamit ang “samadhi” (kaligtasan) at muling mabuhay bilang isang Diyos, matapos ang ikatlong araw.

Ngunit sa halip na bigyan ng payo at liwanagin ang isipan ni Kharol, ipinagdiwang pa ng mga kabaryo niya ang kanyang desisyon at tumulong sa paghuhukay para sa paglilibingan. At kamakailan nga, sa unang araw ng Navratra, inilibing nila si Kharol, sa utos na rin nito.

Nagtipun-tipon ang mga residente ng lugar at ng mga kalapit nitong komunidad para sa malaking ritwal, at matapos ilibing ay sinimulan nila ang pagsamba sa puwestong pinaglibingan niya. Masuwerte namang nakarating sa kaalaman ng isang kalapit na istasyon ng pulis ang ritwal, at agad sumugod sa lugar.

Ayon kay Officer Mansingh Dev, noong una ay pinigilan pa sila ng mga tao na makialam sa ritwal at kinailangan pa nilang kumbinsihin ang mga nakatatanda na maaaring mamatay ang kanilang inilibing dulot ng suffocation.

Halos wala nang malay si Kharol nang mahukay ito kaya agad na isinugod sa ospital. Nanindigan naman siya na sarili niyang kahilingan ang magpalibing nang buhay at tumulong lang ang kanyang mga kapitbahay.

Sa ngayon ay sinampahan na ng reklamo si Kharol at ang kanyang mga kapitbahay bagamat hindi malinaw kung anong kaso ang ihahain sa mga ito.