SC justices ‘di na sasalang sa public interview

Nagpasya ang Judicial and Bar Council (JBC) na huwag nang magsagawa ng public interviews sa senior magistrates ng Supreme Court (SC) na kandidato para maging susunod na chief justice (CJ).

Inihayag ni Justice Secretary at JBC Ex Officio member Menardo Guevarra na napagdesisyunan ito matapos pagbotohan ng JBC kung tatanggapin o hindi ang SC resolution na nagsasabing ang mga mahistrado ng mataas na korte ay dapat na exempted sa public interviews.

“In the end, by a majority vote, the JBC agreed to dispense with the public interviews of senior SC justices vying for the CJ position, without prejudice to closed-door interviews by the members of the JBC,” saad sa pahayag ni Guevarra kahapon.

Batay sa tradisyon, ang senior magistrates ng SC ay awtomatikong nominado sa puwesto ng chief justice ngunit kailangan nilang tanggapin ang automatic nomination bago maisama bilang kandidato.

Sa limang senior SC magistrates, ang mga tumanggap na ng kanilang automatic nomination ay sina Senior Associate Justices Antonio Carpio, Diosdado Peralta, Lucas Bersamin, at Estela Perlas-Bernabe. Tanging si Senior Associate Justice Mariano del Castillo ang tumanggi.

Binuksan ng JBC ang application para sa posisyon ng chief justice noong Oktubre 1 kasunod ng pagretiro ni Chief Justice Teresita Leonardo-De Castro.

Ang deadline para sa pagsusumite ng applications para sa puwesto ay sa Oktubre 26.