Leader ng drug group, timbog
Natimbog ng mga awtoridad ang itinuturong leader ng “Harold Certeza Drug Group” sa buy-bust operation sa Binangonan, Rizal, nitong Linggo.
Sa ulat ni Rizal Police Provincial Office director Senior Supt. Lou Frias Evangelista kay Police Regional Office (PRO)-3 Director Chief Supt. Edward Carranza, kinilala ang suspek na si Harold Certeza, alyas “Poging Baligtad”, 44, tricycle driver, ng Barangay Libis, Binangonan.
Si Certeza umano ang lider ng drug group na nag-o-operate sa Rizal, at pumapangalawa sa Street List Target (SLT) drug personality ng Binangonan.
Lumitaw rin sa beripikasyon na mayroon ding nakabimbing warrant of arrest sa hukuman si Certeza dahil sa paglabag sa Comprehensive Dangerous Drugs Act of 2002.
Batay sa ulat ng Binangonan Municipal Police, dakong 5:00 ng hapon nang isinagawa ng mga pulis ang buy-bust operation laban sa suspek sa naturang lugar.
Umaktong poseur buyer si SPO2 Walter Mercado, at kasama ang isang confidential agent ay bumili umano ng isang pakete ng shabu mula sa suspek, sa halagang P1,000.
Nang magkaabutan ng kontrabando at marked money, nagpakilalang pulis si Mercado at inaresto ang suspek.
Nakumpiska umano mula kay Certeza ang isang pouch na may walong pakete ng shabu, P6,900 cash, t ang P1,000 marked money.