2 ‘rebelde’ tinorture —farmers’ group
CABANATUAN CITY - Pinahirapan umano ang dalawang babaeng estudyanteng matapos silang dakpin sa liblib na lugar sa General Tinio, Nueva Ecija nang paratangang kaanib ng New People’s Army (NPA), kamakailan.
Ayon sa Alyansa ng mga Magbubukid sa Gitnang Luzon (AMGL), tinaniman din umano ng mga ebidensiya sina Michelle Ledesma, 20; at Nicole Diamsay, 18, upang palabasing miyembro ang mga ito ng kilusang nag-o-operate sa kabundukan ng lalawigan.
Nilinaw ng grupo na parehong ordinaryong estudyante lamang ang dalawa at walang kinaanibang underground movement.
Si Michelle ay 4th year college at kumukuha ng kursong edukasyon sa isang pribadong pamantasan sa lalawigan, habang si Nicole ay nasa unang taon pa lang ng kursong Development Communication (DevCom) sa Central Luzon State University (CLSU).
Sina Ledesma at Diamsay ay inaresto ng mga tauhan ng Criminal Investigation and Detection Group (CIDG) habang namamahinga sa Sitio Bangkusay, Bgy. Talabutab Norte, nitong Oktubre 13.
Bago ang pag-aresto, pinadapa umano ang mga ito at sinabitan ng mga baril bago sila kinunan ng litrato. Pinukpok pa umano ang dalawa ng matigas na bagay.