Flight pa-Bora, ‘wag limitahan
BORACAY ISLAND, Malay, Aklan - Nanawagan kahapon sa Department of Tourism (DoT) ang grupo ng mga negosyante sa Boracay na huwag limitahan ang mga eroplanong nais bumiyahe patungong Kalibo International Airport (KIA).
Sa pahayag ni Compliant Association of Boracay (CAB) Vice President Boyet Sacdalan, sana ay bigyan ng pagkakataon ni DoT Secretary Berna Puyat ang Aklan upang maialok sa mga turista ang maraming tourism destination sa lugar.
Nauna nang inihayag ni Puyat na nakipagpulong na siya sa mga airline company na i-restrict ang mga pasaherong nais bumiyahe patungong Aklan, dahil may sinusunod na carrying capacity ang isla ng Boracay.
Maliban, aniya, sa white beach ng Boracay, may iba pang white beach na makikita sa lalawigan, kabilang na ang Jawili Beach sa Tangalan, at Hinugtan Beach sa bayan ng Buruanga.
Isa rin, aniya, sa maaaring maging resulta ng pagkontrol sa mga pasahero sa isang international flight ay ang pagmamahal ng ticket ng airline companies.