Sagay massacre, ‘solved’ na—PNP
Itinuturing nang “case solved” ang pagmassacre sa siyam na magsasaka sa Sagay, Negros Occidental nitong Oktubre 20, matapos na maisampa ang multiple murder laban sa umano’y mga recruiter.
Gayunman, sinabi ni Philippine National Polisce chief, Director General Oscar Albayalde na hindi pa sarado ang kaso lalo’t blangko pa rin ang pulisya sa motibo ng pagpatay sa mga magsasaka, na kapwa mga miyembro ng National Federation of Sugar Workers (NFSW).
“It’s case solved but it’s not closed kasi gagawa pa ng malalim na investigation dyan (because a deeper probe is on-going),” paliwanag ni Albayalde.
Hanggang sa ngayon, hindi pa dumarating sa konklusyon ang pulisya kung bakit pinatay ang mga magsasaka.
Ito ay sa kabila ng paghahain ng multiple murder charges laban sa umano’y dalawang NFSW recruiters, sina Rene Manlangit at Rogelio Arquillo, at sa lima pa na hindi pinangalanan at patuloy na nagtatago.
“’Yun ang tinitingnan natin kung ano pa ang dahilan dyan. Sigurado, meron pang kadahilanan dyan. For sure, there is a reason,” saad ni Albayalde.
Sa kabila nito, sinabi ng PNP na tuon ng imbestigasyon ang posibleng kaugnayan ng New People’s Army (NPA).
Una nang ipinahayag ng PNP Chief na legal front lamang ng NPA ang NFSW, na mariing itinanggi ng mga sugar workers’ group.
Ayon kay Albayalde, sinusulsulan ng NPA na okupahin ng mga magsasaka ang lupa at kapag may nangyaring engkuwenrto, sa pamahalaan nila ito isisisi.
Hindi naman sinang-ayunan ng NFSW ang pahayag ng PNP at iginiiit na isang private armed group ng Hacienda Nene’s lessee o “aryendador” ang nasa likod ng massacre.
Ang Hacienda Nena, ang lugar na pinangyarihan ng massacre, ay pag-aari ng isang Carmen Tolentino. Ayon sa NFSW, malapit umanong kamag-anak ng isang makapangyarihang landlord ang aryendador.
KIDNAPPING CHARGES Kaugnay nito, nanganganib na makasuhan ng kidnapping ang mga miyembro ng KARAPATAN - Alliance for the Advancement of People’s Rights, isang grupo na nagsusulong ng human rights, dahil sa pagkuha ng kostudiya sa isang batang witness sa massacre.
Ayon kay Albayalde, balak ng tatay ng 14-ayos na lalaki, na sinasibing witness, na magsampa ng kasong kidnapping sa mga miyembro ng KARAPATAN.
Iginiit naman ng KARAPATAN na kinuha nila ang kostudiya ng menor de edad matapos itong dalhin sa kanila ng Department of Social Welfare and Development (DSWD) para sa seguridad nito.