Binatilyo tiklo sa marijuana sa sementeryo

Sa kabila ng mga paalala ng awtoridad at cemetery administrators sa publiko na huwag magdala ng mga ipinagbabawal sa sementeryo, isang 16-anyos na lalaki ang inaresto dahil umano sa pagbibitbit ng marijuana sa Manila North Cemetery, nitong Huwebes ng umaga.

Ayon kay National Capital Regional Police Office (NCRPO) Director Guillermo Eleazar, itinago ng binatilyo ang dalawang pakete ng marijuana sa kanyang kilikili at pantaloon habang papasok sa naturang sementeryo, dakong 4:30 ng madaling araw.

Gayunman, ipinagpilitan ng suspek na ang drogang nakuha sa kanya ay personal at hindi ibinibenta.

Iti-turn over ang suspek sa Department of Social Welfare and Development, ani Eleazar.

Mahigpit na ipinagbabawal ang pagdadala sa sementeryo ng baril at nakamamatay na armas; matatalim na bagay gaya ng kutsilyo, screwdrivers, ice picks; alagang hayop; sound systems; at flammable materials gaya ng lighters, thinner, alcohol, at gas.

Pagsunog ng basura, pag-inom ng alak at sugal ay bawal din sa sementeryo.