Mag-ama, 3 parokyano dinampot sa buy-bust
Arestado ang mag-ama makaraang bentahan ng ilegal na droga ang mga undercover cop sa Barangay Parang, Marikina City, kahapon ng madaling araw. Dinakip din ang tatlong parokyano ng mga ito.
Inaresto ng mga tauhan ng Station Drug Enforcement Unit (SDEU) ng Marikina City Police, na pinamumunuan ni Police Insp. Greco Gonzales, sina Christopher Dioquino, alyas Tupe, 21; at Roberto Dioquino, alyas Kuya Boy, 59; at kanilang mga parokyano na sina Jose Archimedes Petilla, 54; Roberto Bedural, 29; at John Lenon Fabon, 22.
Sa ulat ng Eastern Police District (EPD), inaresto ang mga suspek sa 138 P. Paterno Street, sa Bgy. Parang, dakong 12:30 ng madaling araw.
Una rito, Oktubre 30, isang impormante ang lumapit sa himpilan ng SDEU upang ireport ang bentahan ng ilegal na droga sa kanilang lugar, na kinasasangkutan ng isang alyas Tupe.
Dahil sa nakalap na impormasyon, nagkasa ang SDEU ng buy-bust operation laban sa mga suspek.
Agad na dinamba ang mga suspek nang magpositibo ang transaksiyon. Hindi rin nakaligtas ang kanilang mga parokyano.
Narekober sa mga suspek ang walong pakete ng hinihinalang shabu, na nagkakahalaga ng P10,000; P500 buy-bust money; P900 cash at isang coin purse.
Kasalukuyang nakapiit ang mga suspek at nahaharap sa mga kasong paglabag sa Comprehensive Dangerous Drugs Act of 2002 (RA 9165).