2 rebelde sumuko sa Mindoro
Dalawang aktibong miyembro ng New People’s Army (NPA) ang boluntaryong sumuko, bitbit ang kanilang mga armas, sa kampo ng 76th Infantry Battalion (76IB) sa Barangay San Luis, Mamburao, Occidental Mindoro, kamakailan.
Sa report mula kay Lt. Col. Mario Lito Retirva, comanding officer ng 76IB, ang dalawang hindi pinangalanang rebelde ay kabilang sa Platoon Falcon ng underground movement na nag-o-operate sa hilagang bahagi ng probinsiya.
Bukod sa isinukong M16 rifle, ibinunyag din umano ng mga sumukong rebelde ang lugar kung saan nakabaon ang mga armas ng kanilang grupo sa bulubunduking bahagi ng Bgy. Batong Buhay, Sablayan.
Nang puntahan ang lugar, nadiskubre ang apat pang matataas na kalibre ng baril.
Ayon sa militar, inamin ng dalawa na nagsilbi silang recruiter ng kanilang grupo sa loob ng halos tatlong taon, ngunit dismyado sila sa umano’y maling pamamalakad sa kanilang kilusan.
Hindi rin umano tinupad ng kanilang mga kumander ang pangakong suportang pinansiyal sa kanilang pamilya kaya nakaranas sila ng hirap, gutom at pagtatraydor dahil sa serye ng operasyon ng militar laban sa kanilang grupo.
Ikinatuwa naman ng militar ang pagbabalik-loob sa gobyerno ng dalawa, na isasailalim sa Enhanced Comprehensive Local Integration Program (E-CLIP) upang makakuha ng benepisyo at iba pang suporta mula sa pamahalaan.