‘Gun running leader’, timbog

Naaresto ng mga awtoridad ang isang lalaki na pinaniniwalaang lider ng isang gun running syndicate sa Barangay Pinagbuhatan, Pasig City, kamakalawa.

Kinilala ni Eastern Police District (EPD) director, Police Chief Supt. Bernabe Balba ang naaresto na si Pane Usodan, 53, may-ari ng Jam’s Motorcycle Parts and Accessories, at residente ng Block 42, Lot 2&3 ng Bgy. Sta. Ana, Taytay, Rizal.

Si Usodan ang sinasabing lider ng Usodan gun running syndicate, na sangkot sa pagbebenta ng loose at hindi lisensiyadong mga armas sa Taguig at Pasig.

Sa ulat ng Pasig City Police, na pinamumunuan ni Police Senior Supt. Rizalito Gapas, inaresto si Usodan ng pinagsanib na puwersa ng Eastern Police District Intelligence Unit at Southern DFU CIDG NCR sa loob ng Jam’s Motorcycle Parts and Accessories, na matatagpuan sa C6 Road, corner Eusebio Avenue sa Bgy. Pinagbuhatan, bandang 12:20 ng hapon.

Una rito, nakatanggap ng tip ang pulisya hinggil sa illegal na aktibidad ng suspek kaya agad na sinalakay ang kanyang shop, sa bisa ng Search Warrant No. 28-2018 na inisyu ng Pasig City Regional Trial Court (RTC) Branch 152 para sa kasong paglabag sa Republic Act 10591 o Comprehensive Firearms and Ammunitions Regulation Act.Nakumpiska

sa mga suspek ang isang itim na bag, isang .38 caliber revolver na walang serial number, at limang bala.