‘Ni-rape’ ng 2 pulis, may death threats

Ipinangako kahapon ng National Capital Region Police Office (NCRPO) sa 22-anyos na ginang na umano’y ginahasa ng dalawang bagitong pulis, na titiyakin nila ang seguridad nito kasunod ng napaulat na nakatatanggap ito ng banta sa buhay.

Ito ang tiniyak ni NCRPO Director Guillermo Eleazar at sinabing hindi nila kinukunsinti ang maling pinaggagawa nina PO1 Severiano Montalban at PO1 Jayson Portuguez, na inaakusahang gumahasa sa nasabing babae.

Sa naunang panayam, ibinunyag ng biktima na nakatatanggap siya ng death threats na nagsasabing umurong na siya sa pagsasampa ng kaso laban sa dalawang pulis.

“Natatakot akong bisitahin ang asawa ko sa kulungan. Hindi rin ako makapunta sa bahay na inuupahan namin dahil sa takot. Nakikiusap po ako, ‘wag n’yo akong iwan sa laban na ito, natatakot talaga ako sa mga natatanggap kong banta,” pakiusap ng ginang kay Eleazar.

Siniguro rin ni Eleazar na tutulungan ng PNP ang ginang sa kaso nito laban kina Montalban at Portuguez, at kapag napatunayang nagkasala ang dalawang pulis ay papanagutin niya ang mga ito.

“Rest assured that we will not tolerate this. In fact, I salute and thank you for standing up. Because of your bravery and strength, this will serve as a stern warning against all other cops to think many times before commiting the same offense. With what you have done, you are saving the future victims,” sabi ni Eleazar.

Matatandaang ginahasa umano ang babae sa loob ng isang nakaparadang mobile car sa bahagi ng parking lot ng isang ospital sa Quezon City, kapalit ng kalayaan nito matapos na mahuli sa illegal gambling sa Novaliches, nitong Nobyembre 2.