Palawan officials, binalaan ni Duterte
Binalaan ni Pangulong Duterte ang lokal na mga opisyal ng Palawan na resolbahin ang madalas na nararanasang power outage sa isla, bago matapos ang kasalukuyang taon.
Sa kanyang pagdalo sa paglulunsad ng unang Subaraw Biodiversity Festival ng lalawigan, sa Puerto Princesa City nitong Sabado ng gabi, sinabi ng Pangulo na gagawa na lang siya ng hakbangin kung hindi malulutas ang nasabing power interruption na arawaraw na nararanasan simula pa noong nakaraang taon.
Mula anim hanggang walong oras aniyang nararanasan ang brownout sa Palawan.
“’Yung inyong ilaw dito, at this late of the day of development in the country, may brownout kayo na six to eight hours. That is not acceptable to me," ayon sa Pangulo.
“On the extreme, maybe I will just give you guys, walang personalan 'to. Trabaho lang. I’ll give you about towards the end of the year a new set up that could provide enough energy to run a place and so that it can develop, operate and it can move. You have to upgrade your source of energy,” banta ni Duterte.
Aniya, magpapasok siya ng malalaking player, kahit na mga banyagang mamumuhunan, kung hindi pa rin mareresolba ng pamahalaang panglalawigan ang usapin.
“Kasi kapag hindi, ang gawain ko, maghanap ako ng may pera talaga. China nangangati ang kamay niyan, eh, just to get hold of developments here. I will expropriate your franchise. Bilihin ko 'yan, at an evaluation that is fair, just compensation, to end this almost an impasse,” aniya.
Sinabi rin ng Pangulo na nais niyang kausapin si Palawan Gov. Jose Alvarez at Puerto Princesa Mayor Lucilo Bayron kaugnay ng naturang kontrobersiya.
“I will allow other players to enter and I will allow them to buy you out and I will exercise the right of the state to eminent domain. Either do it or I will do it for you. I will wait your decision. I will expropriate. That’s the only thing. I cannot confiscate,” sabi pa ni Duterte.