Wanlu at puppets, magpapakitang gilas sa CCP
MAGLAKBAY sa mundo ng mahika at puppetry sa Wanlu And His Puppets sa Disyembre 7 sa Tanghalang Huseng Batute (CCP Studio Theater).
Tampok sa 90-minute family show si Juancho “Wanlu” Lunaria at kanyang mga marionette at ventriloquist puppet. Layunin ng show na makalikom ng pondo para sa travel expenses ni Wanlu at kanyang pamilya, dahil sila ang magiging kinatawan ng Pilipinas sa 5th International Marionettes Festival sa Vietnam at sa Phuket Harmony World Puppet Festival sa Thailand.
Tinaguriang Philippine Ambassador of Puppetry, sinimulan ni Wanlu ang kanyang entertainment career bilang isang magician. Tinuruan at ginabayan nina Nap Fernandez, Danny Luchavez, Lou Hilario, at Burik, naging takbo na ng buhay niya ang pagbibigay ng kasiyahan sa publiko sa loob ng mahigit 20 taon.
Sumali na rin siya sa Talentadong Pinoy, isang talent competition, noong 2009. Ito ang panahon kung kailan niya napagdesisyunang sumugal sa ventriloquism, bilang paraan ng pagpapalawak ng kanyang abilidad at kakayanan. Natutunan niya ang art ng ventriloquism mula sa kanyang mentor, si Ony Carcamo.
Ilan sa kanyang puppet friends ay sina Nicolo, isang six-year-old wisecrack kid puppet, kapatid nitong si Angelina, Manny Pexman, Rep. Dominador ng Lakas Loob Party, Mang Caloy ng Amoy Pawis Partylist, Plus Kap, Ozham the Mystic, Gort the Alien, at iba pa.
Mayroon din siyang lovable animal puppets – sina Andhokzz the Chicken, DD Gandang Ibon the Ostrich, Santiago the Parrot, at Gonzo, ang high technology animatronic monkey puppet.