Industrial park sa ‘Pinas, plano ng China
SINGAPORE – Naghahanap ang China ng malaking lupa sa Pilipinas upang mapaunlad ang industrial parks, ayon kay Trade Secretary Ramon Lopez.
Ipinahayag ito ni Lopez bago ang nakatakdang pagbisita ni Chinese President Xi Jinping sa Pilipinas sa susunod na linggo
Sa isang panayam dito, sinabi ni Lopez na ang memorandum of understanding (MOU) para sa industrial park ay isa sa mga dokumentong lalagdaan sa pagitan ng Pilipinas at China sa pagbisita ni Xi.
Gayunman, hindi na nagbigay ng karagdagang detalye si Lopez at sinabing patuloy ang konsultasyon sa mga Chinese.
“Ang alam ko meron on industrial park. Some companies also--actually may isa ring interested pa makahabol, possibly an iron and steel manufacturing,” sabi niya.
“But it’s not yet cleared, eh, with the Chinese side. So parang may ongoing consultation pa. But ang alam kong kasama na is that MOU on industrial park,” dagdag niya.
Sinabi ni Lopez na naghahanap pa ang China ng malawak na lupa sa Pilipinas kung saan maaaring itayo ang industrial park.
“Nag-i-spot na lang sila ng location--saan ilalagay ‘yung mga industrial parks. [Ito ay] open to the entire country,” sambit niya.
“They’re looking into township. That’s why they require vast tract of lands, eh. So instead of the usual 200 hectares for their manufacturing, they would even require even more that 1,000 hectares,” dagdag niya.
“So doon minsan nagtatagalan. Ano’ng lugar sa atin ang pwede pang maka-offer ng mga ganoong kalalaking lugar na sinasabi nila malapit sa port, or at least pwedeng mag-develop ng port,” pagpapatuloy niya.