NAGTANGHAL KAHIT BANNED
SINENTENSYAHAN ang isang popular na Russian rapper nang 12 araw na pagkakakulong nang magtanghal sa ibabaw ng kotse, sa lansangan, makaraang ipagbawal ng mga prosecutor ang kanyang gig.
Inaresto si Husky, na may malaking following ng kabataang Russians dahil umaabot ang kanyang videos ng hanggang six million views sa YouTube, nitong Miyerkules. Hinatulan ng korte sa southern city ng Krasnodar si Husky sa hooliganism.
Nakatakdang mag-perform ang 25-anyos na rapper, tanyag sa kanyang mga kanta ng pagkutya sa mga awtoridad at police brutality, sa Krasnodar nang balaan ng mga prosecutor ang venue na kanyang pagtatanghalan na ang kanyang mga awitin ay may elemento ng “extremism.”
Dahil dito ay inilipat ang Wednesday’s gig sa ibang club, kung saan pinatay ang kuryente at nagkalat ang fans ni Husky sa labas ng venue. Maraming video ang nakapost online na kumakanta si Husky, tunay na pangalan ay Dmitry Kuznetsov, sa ibabaw ng kotse habang nakikisabay ang fans.
Hinayaan ng mga pulis na matapos ni Husky ang pagkanta bago siya dinakma at ikinulong, pero bago iyon, nahirapan ang mga pulis na dalhin sa presinto ang rapper dahil hinaharangan ng fans ang police vehicle, habang nagdedemand na palayain si Husky. Kalaunan ay napaalis din ang mga ito ng mga awtoridad.
Inihayag din ng local police na nagsampa ng reklamo ang may-ari ng sasakyang pinagtanghalan ni Husky ng property damage, ang kaso na maaaring maging sanhi ng kanyang mas matagal na pagkakakulong. Hindi pa malinaw kung ipapataw kaagad ito ng mga awtoridad.
Inihayag ng rapper sa korte na siya ay napilitang magtanghal sa lansangan dahil nakasenla ang kanyang concert nang wala man lang paliwanag. Aniya, handa siyang magbayad ng para sa anumang damage sa sasakyan.
“I acted in such a way because I faced a situation when I felt an obligation to talk to the people who had bought tickets,” sabi ni Husky sa korte.