GILAS!
Team Philippines-Davao at Palawan, arangkada sa 10th BIMP-EAGA
BRUNEI— Tuloy ang ratsada ng Davao swimming team, habang ipinamalas ng Palawan ang matibay na programa sa athletics sa impresibong panalo sa ikalawang araw ng kompetisyon nitong Sabado sa 10th Brunei-IndonesiaMalaysia-Philippines-Northern TerritoryEast Asia Growth Area (BIMPNT-EAGA) Friendship Games sa Hassanal Bolkiah National Stadium here.
Tinanghal na unang Pinoy double gold medalist si Fritz Jun Rodriguez nang pagbidahan ang Davao sa dominanteng panalo sa 100 meter breast stroke sa tyempong 1:09.59. Nauna nang nadomina ng 17-anyos at ngayo’y recruit ng San Beda College ang 50-meter breast sa pagsisimula ng swimming event nitong Biyernes.
Hindi naman matatawaran ang hataw ni Eirron Seth Vibar sa 200 meter butterfly sa tyempong 2:16. Naidagdag ng Grade 10 student mula sa Apo Learning Village sa Davao City ang panalo sa naunang dalawang silver na naiuwi sa opening day.
Sa ikalawang araw ng kompetisyon, tangan ng Davao splashers ang limang gintong medalya.
Agaw-pansin naman ang Palawan sa biennial event na naglalayong palakasin at paigtingin ang magandang relasyon sa ekonomiya at politika. Sa pamamagitan ng sports sa mga bansang kalahok.
Kapwa sinungkit nina Jessel Lumapas at John Lloyd Cabalo, magkababaryo sa San Vicente, Palawan, ang gintong medalya sa women’s at men’s 400 meters.
Nailista ni Lumapas ang winning time na 57.47 segundo, habang nakatawid sa finish line si Cabalo sa tyempong 50.14 segundo.
Sa darating na pasukan, kapwa bahagi ng National University scholarship program sina Lumapas at Cabalo.
Nakamit din ni Lumapas ang silver medal sa century dash sa tiyempong 12.65. Nagwagi rito si Chelsea Cassioppea Evalib ng Sabah sa pinakamabilis na oras na 12.35.
Nakumpleto ng Sabah ang sprint double nang gapiin ni Desmon Wong Tzyy Luen si Eveans Oteng ng Northern Territory sa oras na 11:28. Naisumite ni Oteng ang 11:35.
Suportado ng Philippine Sports Commission (PSC) sa pamumuno ni Chairman William ‘Butch’ Ramirez, gayundin ng pamahalaang pambayan ng Davao at Palawan at Mindanao Development Authority ang partisipasyon ng may 100 atleta at supporting personnel dito. Si Commissioner Charles Raymond Maxey ang Chief of Mission.