28,000 Pinoy, hinarang vs human trafficking
Mahigit 28,000 Pilipinong manlalakbay ang pinigilang umalis sa bansa sa unang 10 buwan ng taon sa pinaigting na kampanya ng Bureau of Immigration (BI) laban sa human trafficking.
Ayon kay BI Port Operations head Grifton Medina, nasa kabuuang 28,467 pasahero ang hindi pinasama sa kanikanilang flight nang madiskubreng kulang sa requirements para sa overseas-bound passengers.
Aniya, ang mga requirement na ito ay nakapailalim sa Guidelines on Departure Formalities for International-Bound Passengers, na itinakda ng Department of Justice at ipinatutupad ng BI upang maiwasan ang human trafficking.
“What we are trying to prevent here is allowing the departure of victims of human trafficking and illegal recruitment,” ani Medina.
Sa record, ang 28,467 indibiduwal na hinarang simula Enero hanggang Oktubre, 23,239 ay sa Ninoy Aquino International Airport (NAIA) habang ang mga natira ay sa Mactan, Clark, Iloilo, Kalibo, at Davao.
Iniulat din Medina na mula Hunyo hanggang Oktubre, 151 menor de edad, na patungong Saudi Arabia bilang overseas Filipino workers (OFWs), ang hinuli dahil sa pandaraya sa kanilang edad.
Nitong Agosto, apat na Pinoy ang nasagip mula sa umano’y illegal recruiter sa Clark makaraang tangkain ng isang German na pamahalaan ang kanilang biyahe sa pagpapakilala bilang mga volunteers, gayong ang kanilang intensiyon ay magtrabaho bilang caregivers sa Germany.
Nitong Nobyembre, anim na babae ang hinarang nang madiskubreng peke ang kanilang dokumento para makapagtrabaho bilang nightclub entertainers sa Korea.
Pinuri naman ni Immigration Commissioner Jaime Morente ang BI port personnel sa pagiging alisto.
“There will be no letup in our campaign so long as there are syndicates who continue to unlawfully send abroad our countrymen who are prone to abuse and exploitation in foreign lands,” pahayag ni BI chief.