Baguio, ‘wag isara sa turista -- Domogan

BAGUIO CITY – Nanawagan kahapon sa pamahalaan ang local government ng Baguio City na huwag isara sa mga turista ang summer capital ng bansa, kahit isailalim pa ito sa rehabilitasyon.

Ayon kay City Mayor Mauricio Domogan, pabor ito sa isinusulong ng gobyerno na rehabilitation upang manumbalik ang dating anyo nito basta hindi ito isailalim sa total closure.

Tinukoy ng alkalde ang naganap na rehabilitasyon ng Boracay Island na anim na buwan na isinara sa publiko na nagresulta sa pagkalugi ng mga negosyo sa isla.

Inilabas ng opisyal ang reaksyon bilang tugon sa pahayag ni

Department of Environment and Natural Resources (DENR) Undersecretary for Solid Waste Management and Local Government Unit Concerns Benny Antiporda, isusunod na nilang ire-rehab ang Baguio City, pagkatapos ng Boracay, Palawan at Bohol.

“We welcome the help of the DENR if they can further augment what we have been doing with the EMB (Environmental Management Bureau) and the MGB (Mines and GeoSciences Bureau) in rehabilitating portions of the city that need rehabilitation. But we do not like is to generalize that Baguio will be like Boracay because Boracay’s case is entirely different and there is no need for the city to be closed in order to rehabilitate. Baguio is a landlocked area aside from serving as a gateway to other areas in the different parts of Northern Luzon,” aniya.

Aniya, matagal na silang gumagawa ng paraan upang masolusyunan ang problema sa polusyon sa tubig at hangin sa pamamagitan ng kanilang mga proyekto at programa, katulong ang DENR Cordillera.

Inobliga na rin aniya nila ang mga residente at mga business establishment na maglagay ng kani-kanilang septic tank bilang bahagi ng kanilang programa.