400 Pinoy nurse, kailangan sa Germany
Inihayag ng Department of Labor and Employment (DoLE) na tumatanggap na ang Philippine Overseas Employment Administration (POEA) ng mga aplikasyon para sa nurse sa ilalim ng Triple Win Project ng Germany.
Ang Triple Win Project ay isang joint initiative ng German Federal Employment Agency (BA) at ng POEA na layuning makapagpadala ng mga nursing professional sa iba’t ibang panig ng Germany.
Ilan sa kuwalipikasyon ay lalaki o babae, dapat Filipino citizen at permanenteng residente ng Pilipinas, graduate ng Bachelor of Science in Nursing, may aktibong Philippine Nursing License, at may dalawang taon na professional experience (bedside) sa mga ospital, rehabilitation center at care institution.
Ang aplikante ay dapat na mayroon ding German language proficiency o handang sumailalim sa German language training sa Pilipinas upang magkaroon ng Level B1 (na babayaran ng employer) at kailangan dumalo sa mga language class sa Abril at Mayo 2019; o may Bl or B2 Language Proficiency Level alinsunod sa Common European Framework of Reference for Languages.
Ang makukuhang aplikante ay tatanggap ng panimulang buwanang suweldo na €1,900 (P113,000) na tataas pa sa € 2,300 (P137,000) matapos kilalanin bilang qualified nurse.
Ang employer din ang magbabayad ng visa at tiket sa eroplano mula Pilipinas patungo sa Germany.
Ang mga kuwalipikadong aplikante ay dapat magparehistro online sa www. eservices.poea.gov.ph at personal na magsumite ng mga kinakailangang dokumento sa “German Federal Employment Agency RSF No. 180028” sa Manpower Registry Division, Ground Floor, Blas F. Ople Bldg. (formerly POEA Bldg.), Ortigas Avenue corner EDSA, Mandaluyong City.
Magsagawa ng interview ang employers sa Marso 2019.
Ang deadline para sa pagsusumite ng aplikasyon sa POEA Central at Regional Offices ay sa Pebrero 28, 2019.