Medical teams, ipakakalat sa Traslacion
Magpapakalat ng may 1,000 tauhan at volunteers ang Philippine Red Cross (PRC) upang umagapay at magkaloob ng karampatang tulong medikal para sa taunang Traslacion sa Miyerkules, Enero 9.
Ayon kay PRC Chairperson Senator Richard Gordon, nasa 600 emergency responders mula sa PRC ang ipoposisyon nila sa iba’t ibang first aid stations na daraanan ng prusisyon, habang ang 400 iba pa ay nakaantabay naman sa iba pang lugar.
Magde-deploy din umano ang PRC ng walong ambulansiya sa paligid ng ruta ng Traslacion, habang 32 iba pang ambulance vehicles sa Metro Manila ang nakaantabay sakaling magkaroon ng emergency situations.
Nabatid na isang malaking tent ang magsisilbing emergency unit, na pagdadalhan ng mga debotong posibleng mangailangan ng tulong medikal na hindi kayang matugunan sa mga itinalagang first aid stations.
Sinabi ni Gordon na mayroon rin silang nakaantabay na tatlong rescue boats at amphibians na ide-deploy naman sa mga katubigan malapit sa ruta.
Kasabay nito, pinaalalahanan ni Gordon ang mga may sakit na huwag nang lumahok sa prusisyon upang makaiwas sa anumang aksidente at iba pang health risks, at mariin din niyang ipinapayo na huwag nang isama ang mga bata sa Traslacion.
Sinabi naman kahapon ng Department of Health (DoH) na inalerto na ng kagawaran ang iba’t ibang ospital sa Maynila kaugnay ng Traslacion.
“We have, on standby, our medical teams in different DoH hospitals,” sabi ni DoH-NCR Epidemiology and Health Emergency Cluster head Dr. Patrick Co.
Aniya, magpapakalat ang DoH ng 14 na emergency health team sa iba’t ibang bahagi ng ruta ng prusisyon.