Taiwan, nag-aalok ng amnestiya sa overstayers

Inilunsad kahapon ng National Immigration Agency (NIA) ng Taiwan ng Overstayers Voluntary Departure Program, isang five-month amnesty program para hikayatin ang lahat ng mga banyaga na ilegal na nananatili sa bansa na sumuko o mahaharap sa mabibigat na parusa.

Sa isang press conference, inimbitahan ng NIA ang mga kinatawan mula sa Pilipinas, Indonesia, at Vietnam na dumalo at hinimok ang kanilang mga mamamayan na samantalahin ang one-time program.

Para sa buong buwan ng Enero 2019, itataguyod ng gobyernong Taiwanese ang programa para ipalaganap ang mga pangunahing elemento nito sa publiko, na kaagad susundan ng lubusang pagpapatupad nito simula Pebrero 1 hanggang Hunyo 30.

Sa tala nitong Oktubre 2018, sinabi ng NIA na mayroong tinatayang 88,000 overstayers sa Taiwan.

Sa ilalim ng mekanismo, ang overstayers na boluntaryong susuko sa loob ng limang buwang programa ay hindi ikukulong ngunit magbabayad ng maximum overstay fine na NTD 2,000 at mas mababang entry ban.

Para sa mga maaresto ng mga awtoridad pagkatapos ng programa, tatanggap sila ng matinding parusa, hindi binanggit na haba ng pagkakakulong, mas mabigat na overstay fines at mas mahabang entry ban.

Kaugnay ng programang ito, hinimok ng Taiwan government ang kanyang mamamayan na hikayatin ang overstayers na sumuko upang maiwasang maging biktima ng human trafficking o mamaltrato ng kanilang employers. Hinihimok din silang isumbong ang illegal employers at agencies.

Sa oras na maberipika, aayudahan ng NIA ang informant sa pag-apply para makuha ang malaking pabuya mula sa labor affairs authorities.