4 emission testing centers, suspendido sa pamemeke

Sinuspinde ng Department of Transportation (DOTr), sa pamamagitan ng Investigation Security and Law Enforcement Staff (ISLES) nito, ang apat na private emission testing centers (PETC) dahil sa umano’y pamemeke ng emission test results.

Ayon sa DOTr, sakop ng preliminary suspension order (Department Order 2016-017), ang Lucena Grand Service Station, Inc., na matatagpuan sa Diversion Road, Barangay Ilayang Dupay, Lucena City, 4301, Quezon; MCRB Emission Testing Center, na nasa 59 Upper Irisan, Naguilian Road, 2600, Baguio City; One Eighteen Pollution Test Services-Maramag Branch sa National Highway, South Poblacion, Maramag, 8714, Bukidnon; at Iprotek Emission Testing Center - Malaybalay City, 8700, Bukidnon.

Magtatagal ng 90-araw ang suspension order, na sinimulang ipatupad nitong Enero 9, 2019.

Sinabi ng DOTr na napagkalooban na nila ng kopya ang mga naturang PETC, gayundin ang PETC IT Service Provider, na binalaan nitong papatawan ng kahalintulad na parusa kung babalewalain ang kanilang kautusan at ipagpapatuloy pa ang pagproseso sa anumang data na ipapadala sa kanila ng mga naturang sinuspindeng PETC.