British tiklo sa jaywalking, pananakit
Nalagay sa balag na alanganin ang isang British nang arestuhin dahil sa jaywalking sa Makati City, kamakalawa.
Mahaharap sa kasong Direct Assault, Disobedience, Alarm and Scandal at Resisting Arrest si Craig Bennett y Anthony, 31, nakatira sa No. 120 Upper McKinley Road, Taguig City.
Sa ulat ng Southern Police District (SPD), naganap ang insidente sa kahabaan ng Cloverleaf northbound, Barangay Gudalupe Nuevo, sa Makati City, dakong 6:35 ng gabi.
Sa inisyal na imbestigasyon, nagjaywalking si Anthony sa nasabing lugar dahilan upang sitahin at isyuhan ng citation ticket nina Traffic Constable (TCI) Jowil Memita y Antenero, 37; at TCIII Almer Acuning y Serrano, 34, kapwa empleyado ng Metropolitan Manila Development Authority (MMDA).
Subalit bigla umanong sinigawan ng dayuhan ang traffic constables at siniko sa dibdib si Memita.
Agad na humingi ng ayuda ang dalawang traffic constable sa mga pulis at dinala ang dayuhan sa presinto para sa dokumentasyon.