4 PETC, sinuspinde ng DOTr
Apat na private emission testing center (PETC) ang sinuspinde ng Department of Transportation (DOTr) dahil sa umano’y pamemeke ng emission test results.
Ang kautusan ay ipinatupad ng Investigation Security and Law Enforcement Staff (ISLES) ng ahensya.
Kabilang sa sinuspinde ang Lucena Grand Service Station, Inc., na matatagpuan sa Diversion Road, Brgy. Ilayang Dupay, Lucena City, 4301, Quezon; MCRB Emission Testing Center, na nasa 59 Upper Irisan, Naguilian Road, 2600, Baguio City; One Eighteen Pollution Test Services-Maramag Branch sa National Highway, South Poblacion, Maramag, 8714, Bukidnon; at Iprotek Emission Testing Center - Malaybalay City, 8700, Bukidnon.
Magtatagal ng 90-araw ang suspensyon na sinimulang ipatupad nitong Enero 9, 2019 lamang.
Nilinaw ng DOTr, napagkalooban na nila ng kopya ang mga naturang PETC, gayundin ang PETC IT Service Provider, na binalaan nitong papatawan ng kahalintulad na parusa kung babalewalain ang kanilang kautusan at ipagpapatuloy pa rin ang pagproseso sa anumang data na ipapadala sa kanila ng mga naturang sinuspindeng PETC.