Play button, inakalang parte ng hairdo
Trending kamakailan sa Chinese social media ang isang lalaki, matapos niyang ibahagi ang kanyang “bad hair day”.
Dalawang symbol ng “play button” ang nakaahit ngayon sa buhok ng isang lalaki sa China matapos niyang ipakita sa kanyang hair stylist ang isang paused video ng nais niyang inspirasyon sa kanyang bagong hairstyle.
Kalimitan nang ipinapakita ng isang magpapaayos ng buhok ang larawan ng isang hairstyle na nais niyang subukan. Ngunit malaking pagkakamali ang ginawang ito ng lalaki sa China, na gamitin ang isang pause video sa kanyang cell phone para sa kanyang hairdo inspo, dahil maging ang symbol na button play ay nailagay din sa kanyang buhok.
Sa ipinakita niyang video, sakto na nakatapat ang play button sa gilid ng ulo, na inakala ng hair stylist na parte ng hairdo.
Dahil sa katawa-tawang pangyayari, nag-trending ang istorya nang i-share ito sa Weibo, ang Facebook version ng China.
“Actually, that is a rather handsome look. It could be a new trending haircut,” komento ng isang user.