Napa, binitiwan ng Letran

PORMAL ng nagtapos ang tatlong taong kontrata ni Colegio de San Juan de Letran head coach Jeff Napa.

At base sa naging pahayag ng pamunuan ng Letran kahaponhindi na bibigyan ng contract extension si Napa.

“The community of Colegio de San Juan de Letran expresses its hearty and heart-felt gratitude to Mr. Jefferson Napa, head coach of Letran’s Men’s Basketball Team, for the past three NCAA seasons,” nakasaad sa statement ni school rector Fr. Clarence Marquez, OP.

“With the expiration of his contract, Letran acknowledges his most valuable contributions to the team in forming our student-athletes and building our winning culture, especially according to the ideals of the Colegio," dagdag pa nito.

Kinumpirma naman ng pamumunuan ng Letran na magbubuo sila ng search committee na pamumunuan nina Fr. Stephen Besa, OP at special assistant for sports affairs Alfrancis Chua.

Ngunit ang pagpili at huling desisyon kung sino ang magiging bagong coach ng Knights ay manggagaling pa rin kay Marquez.

Si Napa ang pumalit sa dating coach na si Aldin Ayo nitong 92nd season ng NCAA.

Nakapagtala siya ng markang 32-25 sa nakalipas na tatlong taon na nagtapos sa Final Four appearance nila sa nakaraang season.

Pansamantalang magiging coach ng Knights si Robert Joseph Guevarra sa gagawin nilang paglahok sa PBA D-League.

"We wish coach Jeff our best prayers for the future,” ayon pa sa statement ni Marquez.

“And we ask all alumni and friends to rally around our one team Letran and to support our studentathletes in moving on, in moving forward, in conquering new glories for our beloved Alma Mater.”