Pumatay ng ex-live-in partner, inatake sa puso
Posible umanong labis nakonsensiya kaya inatake sa puso at namatay ang matandang lalaking pumatay ng dati nitong kinakasama sa Tondo, Maynila.
Sa ulat ng Manila Police District (MPD)-Crimes Against Persons Investigation Section (CAPIS), sumakit ang tiyan ni Patrick Francisco Ramos, 71, ng Laong Nasa Street, Tondo, kaya isinugod ito sa ospital ngunit binawian din ng buhay, dakong 8:24 ng gabi.
Si Ramos ang pumatay sa dati niyang kinakasama na si Janet Santos, 38, residente ng 783 Int. 31, Ma. Guizon St., Daang Bakal, Tondo, bandang 1:00 ng hapon kamakalawa.
Una rito, pinuntahan ni Ramos si Santos sa bahay nito at naabutang naglalaba.
Pinakiusapan umano ng suspek ang biktima na makipagbalikan sa kanya, ngunit tumanggi si Santos at tinalikuran ang suspek.
Nagalit ang suspek at bumunot ng patalim at pinagsasaksak ang dating kinakasama at tuluyang tumakas.
Nagtago umano ang suspek sa bahay ng kanyang mga kaibigan at pagsapit ng gabi ay nakaramdam ng pananakit ng tiyan kaya isinugod sa ospital at namatay.
Ayon sa mga awtoridad, posibleng inatake sa puso ang suspek dahil sa labis na pagdadalamhati at pagsisisi sa ginawang krimen.