32 probinsiya, apektado ng tagtuyot

Apektado ng tagtuyot ang 32 lalawigan sa bansa, kahit hindi pa man nararamdaman nang husto ang El Niño sa tropical Pacific Region.

Lumabas sa pag-aaral ng Philippine Atmospheric, Geophysical and Astronomical Services Administration (PAGASA), nananatili pa rin sa El Niño level ang sea surface temperature sa Pasipiko.

Gayunman, sinabi ng PAGASA na kung pagbabatayan ang atmospheric indicators, katulad ng nararanasang cloudiness, tradewinds at southern oscillation index, ay hindi nagbabadya na

Magiging matindi ang mararanasang El Niño.

Isa lang ang paniniyak ng PAGASA, unti-unti nang namumuo ang El Niño at inaasahang mararamdaman ang epekto nito sa ilang bahagi ng bansa.

Nauna nang inihayag ng PAGASA na aabot sa 15 na probinsiya ang apektado na ng tagtuyot habang 17 lugar ang nakaranas ng dry spell sa nakalipas na mga buwan.

“Drought is defined as three consecutive months of way below normal (60 percent reduction from average) or five consecutive months of below normal (21 to 60 percent reduction from average) rainfall condition,” ayon sa PAGASA.

Kabilang sa 15 na lugar ang Abra, Apayao, Ilocos Norte, Ilocos Sur, La Union, Pangasinan, Bataan, Bulacan, Nueva Ecija, Pampanga, Tarlac, Zambales, Cavite, Occidental Mindoro, at Palawan, pawang sa Luzon.

Nakaranas na rin ng dry spell ang 12 lugar sa Luzon, tatlo sa Visayas at dalawa sa Mindanao.

Paglalahad ng ahensiya, ang dry spell ay pagkakaroon ng tatlong magkakasunod na buwan na may below normal rainfall conditions.