Pabayang magulang, parusahan din –Palasyo

Hinimok ng Malacañang ang Kongreso na maglagay ng probisyon na papanagutin ang mga pabayang magulang sa mga krimen na nagawa ng mga batang lumabag sa batas matapos ipanukala ng House of Representatives na ibaba ang minimum age of criminal responsibility (MACR) mula sa 15- sa 12-anyos.

Ito ang ipinahayag ni Presidential Spokesperson Salvador Panelo matapos sabihin ni Pangulong Rodrigo Duterte na nais niyang ibaba ang MACR upang ikintal ang disiplina sa mga magulang at mga bata.

Sa kanyang press briefing, sinabi ni Panelo na ang nasabing probisyon ay hindi pa nakapaloob panukalang batas, at nagsuhestiyon na marahil ay mapapabuti pa ng Kongreso ang panukala.

“Baka Congress can introduce provisions to that, na in case of children committing crimes, parents proved to be neglectful then should also be accountable,” aniya kahapon.

Gayunman, sinabi ni Panelo na bahala na ang Kongreso na magpasya kung ano ang nais nilang gawin sa panukala.

“The President is expressing an idea. It’s again on the part of Congress to realize this idea,” aniya pa.

Sa ilalim ng revised penal code, ang mga nagkasalang bata ay ibibigay sa institusyon na pinamamahalaan ng Department of Social Welfare of Development (DSWD). Ayon kay Panelo, ito ay isa nang parusa sa mga magulang.

Samantala, sinabi ng opisyal ng Palasyo na maaari namang magdagdag ng pondo ang pamahalaan sa mga institusyon na paglalagyan ng mga batang pasaway matapos sabihin ni Senator Bam Aquino na kulang ng mga pasilidad ang gobyerno para tumulong sa pagrereporma ng mga bata.

“Kung ‘yan lang ang problema eh ‘di dagdagan natin ng pondo. Napakaliit naman ng problemang ‘yan,” ani Panelo.

Muli namang iginiit ni Sen. Leila de Lima ang pagsasabatas ng kanyang Senate Bill No. 195 o Anti-Criminal Exploitation of Children Act na naglalayong patawan ng mas mabigat na parusa ang mga taong kinakasangkapan ang mga menor de edad sa krimen.

“Lowering the age of criminal liability from 15 to nine years old cannot be an effective response to fight rising criminality. Our children are not the criminals here but victims of abuses and exploitation. They don’t belong in jail,” ani De Lima.