Pinay skaters, sabak sa Winter ‘Children of Asia’ International
WALANG yelo sa Pilipinas, pero masigla ang komunidad ng ice skating sa bansa. At sasabak ang Team Philippines – laban sa mga karibal na lumaki sa nyebe – sa 1st Winter ‘Children of Asia’ International Games sa Pebrero 8-17 sa Yuzhno-Sakhalinsk sa Russia.
Pangungunahan ang Philippine delegation nina coach Frank Masayon at Dale Feliciano para gabayan ang mga batang skaters na sina 15-anyos Charmaine Skye Chua at Dianne Gabrielle Panlilio. Kasama rin sina speed skaters Anthea de Guzman, Xsandrie Guimba, Kayla Gonzales at Lora Sanchez.
“I’m excited and thankful to be part of this once in a lifetime event. I will do my best to represent my country and my school,” pahayag ni Chua, pambato ng St. Jude Catholic School.
Iginiit naman ni Panlilio na gagawin nila ang lahat para makapagtala ng disenteng kampanya sa international meet.
“I expect to put out good performances in my programs, enough to make a good placing in this games and make my country proud,” sambit ni Panlilio.
Ayon kay Masayon, matindi ang pinagdaanang paghahanda at ensayo ng mga batang skaters upang matiyak na hindi kailangang lumaki sa kapaligirang may snow para matutunan at maging mahusay sa ice skating.
“The skaters have been preparing for this for the past year. The winter games will be a chance to witness first hand on how our contemporaries have developed as athletes and the technology, training, and principle they have applied in preparation for competitive skating,” ayon kay Masayon.
Walo ang event sa Winter ‘Children of Asia’ International games, ngunit sa dalawang disiplina lamang sasabak ang Pinoy. Lalaruin din sa torneo ang biathlon, downhill skiing, cross-county skiing, skijumping, snowboarding, hockey at short track.
Bukod sa Pilipinas, sasabak din ang mga bansang Vietnam, China, Indonesia, Jordan, Kazakhstan, Cambodia, Mongolia, Nepal, Pakistan, the Republic of Korea, the United Arab Emirates, Tajikistan, Thailand, Turkmenistan, at Japan.
Nakatuon naman ang pansin sa mga atleta mula sa Russian regions - Moscow, Tatarstan, Bashkortostan at Yakutia. Kasama rin ang lahok ng Far Eastern, Siberian at Ural Federal Districts.
Isasagawa ang torneo sa anim na venues sa Spartak Stadium ng Yuzhno-Sakhalinsk.