Banned na pampaputi, nasa Quiapo pa rin
Binatikos ng EcoWaste Coalition ang mga awtoridad na nalulusutan pa rin ng mga hindi rehistrado at ipinagbabawal na skin whitening products, na ibinebenta pa rin sa Quiapo, Maynila.
Matagal nang ipinagbabawal ng mga lokal at global health authorities ang mga cosmetic products na nagtataglay ng mercury, na lubhang mapanganib para sa tao.
Ayon sa toxic watchdog, aabot sa 1,246-24,100 part per million (ppm) ang mercury concentration na nasuri sa Glow Glowing 5 in 1 Beauty Skin, Feique Herbal Extract Whitening Anti-Freckle Set, Goree Day & Night Whitening Cream, Collagen Plus Vit E Day & Night Cream, Temulawak Day & Night Beauty Whitening Cream, at Erna Whitening Cream.
Mabibili ng P60 hanggang P1,700 bawat isa, sinuri ang mercury sa nabanggit na mga produkto gamit ang isang portable X-Ray Fluorescence (XRF) device.
Ang Glow Glowing 5 in 1 Beauty Skin, na gawang Malaysia at nangangako ng “white, fluffy, smooth skin in seven days”, ay nasuring siksik sa mercury na aabot sa 24,100 ppm.
Ang nasabing produkto ang pinakamahal sa anim, at ibinebenta ng 1,700 kada set.
Samantala, taong 2014 pa ipinagbabawal ng Food and Drugs Administration ang Feique Herbal Extract Whitening Anti-Freckle Set, na mula sa China at may 23,300 ppm ng mercury, at ipinagbibili ng P150 kada set.
Samantala, gawang Pakistan ang Goree Day & Night Whitening Cream, na may 18,800 ppm ng mercury, at 2017 pa ipinagbabawal sa Brunei, Singapore at sa mga bansa sa Europe.
May 8,264 ppm ng mercury ang Collagen Plus Vit E Day & Night Cream; may 7,980 ppm ang Temulawak Day & Night Beauty Whitening Cream; habang nasa 1,246 ppm ang mercury sa bawat maliit na lalagyan ng Erna Whitening Cream.