12-anyos na MASR, ipapasa ng Kamara
Nakatakdang ipasa ng House of Representatives ngayong araw (Enero 28) sa ikatlo at pinal na pagbasa ang panukalang batas na naglalayong ibaba ang minimum age of social responsibility mula 15 sa 12 anyos.
Sinabi ni House Majority Leader and Capiz Rep. Fredenil “Fred” Castro, chairman ng House Committee on Rules, na nakatakda nilang aprubahan ang panuka ngayong araw.
“We will try to pass the bill on minimum age of social responsibility,” ani Castro nang tanungin kung ipapasa ng Lower Chamber ang hakbang sa pinal na pagbasa ngayong Lunes.
Ang House Bill (HB) No. 8858, na naglalayong amyedahan ang “Juvenile Justice and Welfare Act of 2006” o Republic Act (RA) No. 9344, ay inaprubahan sa ikalawang pagbasa noong Miyerkules.
Nagpasya ang plenary na pagtibayin ang bersyon na nagtatakdang 12 anyos ang minimum age of social liability ng mga bata sa halip na siyam.
“The twelve years old was the consensus,” ani Oriental Mindoro Rep. Doy Leachon, chairman ng House Committee on Justice.
Noong Enero 21, 2019, ipinasa ng panel ni Leachon ang substitute na nagbababa sa minimum age of criminal responsibility sa siyam na taon.
Binanggit din ni Leachon na nagpasya ang plenary na palitan ang salitang “criminal” ng “social” mula sa orihinal na minimum age of “criminal” responsibility (MACR) sa minimum age of “social” responsibility (MASR), upang iayon sa bersiyon ng Senado, na pinagdedebatehan pa.
Sa ilalim ng panukalang batas, ang mga bata na sangkot sa murder, parricide, infanticide, serious illegal detention, carnapping, at illegal drugs violation ay isasailalim sa mandatory confinement para sa rehabilitasyon sa Bahay Pag-asa na pamamahalaan ng Department of Social Welfare and Development (DSWD) mula sa local government units (LGUs).
Nakasaad din sa batas na ang mga magulang ng mga batang nagkasala sa batas ay idedetine mula 30 araw hanggang anim na buwan kung hindi sila sasailalim sa “intervention” program na pamamahalaan ng LGUs tulad ng parenting seminars at counselling.
Ang maximum penalty para sa mga gumagamit sa mga bata para gumawa ng krimen ay: reclusion temporal kung ang krimen ay may parusang wala pang anim na taon, at reclusion perpetua kung mahigit anim na taon.
Sinabi ni Leachon na ang convicted children ay idedetine sa agricultural camp sa ilalim ng pamamahala ng Bureau of Corrections (BuCor) ay Technical Education and Skills Development Authority (TESDA).
Kung ang bata ay umabot na sa 18 anyos at hindi pa rin nagrereporma, magbaba ng hatol ang hukom pagsapit niya ng 25 anyos.
Samantala, hinimok kahapon ni Senate President Vicente Sotto III ang publiko na iboto ang senatorial candidates sa May 2019 midterm elections na sumusuporta sa panukalang ibaba ang MACR mula 15 sa 12 anyos.
“Iboto n’yo ang pabor ‘wag niyo iboboto ang kontra,” ani Sotto sa panayam ng radyo DZBB.
Idiniin ni Sotto na ang 12 anyos ay ang “international standard” of criminal responsibility.