Iwas traffic sa NLEX-Camachile
Naglatag ng sari-saring alternatibong daan upang maibsan ang matinding pagsisikip ng trapiko sa southbound lane ng North Luzon Expressway (NLEX) bunsod ng konstruksiyon ng Skyway Stage 3.
Simula Lunes hanggang Sabado noong nakaraang linggo ay tumutukod hanggang sa Marilao sa Bulacan ang trapiko na nagsimula sa Balintawak.
Ito ay dahil sa umabot na sa Camachile ang konstruksiyon ng rampa ng Skyway Stage 3, na literal na idudugtong sa NLEX.
Sa pulong balitaan, inilahad ni NLEX Corporation Chief Operating Officer Raul Ignacio na habang ginagawa ang nasabing imprastruktura ay inaabisuhan nila ang mga motoristang manggagaling sa Northern at Central Luzon na paluwas sa Metro Manila na kumanan sa NLEXSmart Connect Interchange papuntang Karuhatan, Valenzuela City para makarating sa Monumento sa Caloocan.
Maaari rin itong maging ruta ng mga papunta sa Pasay City, o sa Ninoy Aquino International Airport (NAIA), sa pamamagitan ng pagdaan sa NLEX-Smart Connect Interchange, na diretso sa C-3 at lalabas sa Road 10 hanggang makarating sa Roxas Boulevard.
Para naman sa mga papunta sa Quezon City, Marikina, at Pasig, sa NLEX Smart Connect Interchange pa rin puwedeng dumaan papuntang Mindanao Avenue.
Mula roon, maaaring lumusot sa campus ng University of the Philippines, sa pamamagitan ng Luzon Avenue hanggang sa Katipunan papuntang C-5.
Mananatili namang bukas ang rampa ng Cloverleaf para sa mga papuntang Balintawak Market at EDSA-North Avenue.
Sa pagdurugtong ng NLEX at Skyway Stage 3 sa Camachile, inaasahan ang lalong pagsisikip ng trapiko sa NLEX southbound lane, dahil gagamitin ang inner lane o gitnang bahagi ng expressway upang magtayo ng mga poste ng Skyway 3. Iba pa rito ang paggamit sa magkabilang shoulder nito para paglagyan ng rampa.
Ayon kay San Miguel Corporation Project Manager Alex Solomon, target matapos ang bahaging ito sa Disyembre 2019.
Kapag pormal nang nabuksan ang 18-kilometrong Skyway Stage 3, ang mga sasakyang mula sa NLEX ay makakabiyahe na papuntang South Luzon Expressway (SLEX) sa loob lang ng 15-20 minuto, kumpara sa kasalukuyang mahigit dalawang oras.