Huwag iboto ang nagpapaikot ng tao!
DAMANG-dama na ang init ng halalan sa Mayo 13, 2019, at ito lang ang masasabi ko sa mga kababayan nating botante – huwag na huwag iboto ang mga nagpapaikot sa atin!
Bagamat wala pa tayong naririnig na nagsasabing tatakbo sila at humihingi na ng inyong iboto – pawang tinatawag na mga adbokasiya pa lamang ang kanilang pinangangalantaran sa publiko, ngunit halatang-halata na ang intensiyon nilang tumakbo.
Pag-aralan natin ang kanilang mga
sinasabi at ipinapangako, at pagmasdan ang kanilang pamamaraan sa pangangampanya, lalo pa’t kung paano sila gumasta, dahil alam ko, at alam n’yo rin, na ang pulitikong malaki ang ginastos at nanalo sa halalan – siguradong ang babawian ay ang kaban ng bayan!
Pangunahin sa mga pulitikong gusto kong suriin ninyo ang pagkatao – na marahil ay isa rin sa mga ibinoto na ninyo noong nakaraang mga halalan – ay ang grupo ng mga mambabatas na kamakailan lamang ay pilit na minaniobra at pinaikot ang sana’y napakagandang adhikain ng Executive Order No. 2 ni Pangulong Rodrigo Duterte.
Ang EO-2 o “Freedom of Information” ay magbubukas sa publiko ng Statement of Assets, Liabilities and Net worth (SALN) ng mga empleyado sa gobyerno para sa pagsusulong ng transparency. Ito ang mahalagang instrumento ng mga mamamahayag, upang malantad sa mga tao kung gaano ka-corrupt ang ilan sa mga pulitikong kanilang ibinoto at inilagay sa puwesto.
Noong inilabas ang executive order na ito, sinabi ni Pangulong Duterte na magagamit lamang ito para sa mga opisyal sa sangay ng Ehekutibo (Executive),
at nanawagan sa mga mambabatas sa Kongreso na magpatibay ng isang batas upang maging bukas sa publiko ang lahat ng mga SALN ng mga opisyal ng pamahalaan—kabilang ang mga nasa sangay lehislatura (legislative) at hudikatura (judiciary).
Sa SALN lamang kasi makikita at mapagaaralan ng mga mamamayan kung nagpapayaman lamang sa kanilang puwesto ang inihalal nilang mga pulitiko – maliban na lamang kung ito ay madodoktor ng nasabing mga opisyal ng gobyerno, na medyo mahirap namang basta-basta magawa!
Pero biglang nagbago ang ihip ng hangin nang aprubahan ng mga mambabatas kamakailan ang House Resolution 2467, na nagsasaad na kinakailangan ang pag-apruba ng plenaryo sa Kamara bago mailabas ang SALN ng mga mambabatas. At ito ang matindi – anumang hiling para sa SALN ng mga kongresista ay kinakailangan magbigay ng magandang dahilan, kasama pa ang bayad na P300 sa kada kopya.
Mahihirapan dito ang ating mga kasamahan sa media na gustong maghalungkat sa itinatagong yaman ng mga ganid pero nahalal sa puwesto na mga pulitiko – bakit kamo, malaking halaga ang P300
at hindi lamang isa ang kailangang imbestigahan, bagkus ay lahat silang mga mambabatas kaya siguradong walang pambayad para rito ang matitinong mamamahayag na gustong magimbestiga sa lifestyle ng ating mga mambabatas.
Para sa kaalaman ng ating mga botante, ang mga mambabatas na may pakana upang maprotektahan ang kanilang mga SALN mula sa mga mapanuring mata ng ilang taga-media – ay sina Speaker Gloria Macapagal Arroyo, ang author nito; at ang mga co-author niyang sina Majority Leader Fredenil Castro, RepYedda Marie Romualdez, Rep Raymond Democrito C. Mendoza, Rep Delphine Gan Lee, Rep Vicente S.F. Veloso, Rep Cristina Roa-Puno, Rep Joey S. Salceda, Rep Milagros Aquino-Magsaysay, at Rep Mohamad Khalid Q. Dimaporo.
Ang eleksiyon ang tanging paraan upang makaganti tayong mga mamamayan sa mga abusado at corrupt na pulitiko sa ating bayan. Kung binabayaran nila ang inyong boto, aba eh kunin ninyo ang ibinibigay, pero ang isulat ninyong pangalan sa balota ay ‘yung matino niyang kalaban!
Mag-text at tumawag sa Globe: 0936-9953459 o magemail sa: daveridiano@yahoo.com