Kapag buhay ang inutang
SA isang aksiyon na matagal na sanang dapat isinagawa, napagkaisahan ng mga mambabatas na muling ipataw ang parusang kamatayan sa sinumang nag-iingat ng illegal drugs samantalang sila ay dumadalo sa salu-salo, pagpupulong at iba pang social gatherings. Sa third at final reading sa naturang panukalang-batas, pinagtibay din ang kaakibat na multa mula sa P5 hanggang P10 milyon.
Ang muling pagpapataw ng capital punishment o death penalty ay bahagi ng pinag-isang 15 panukalang-batas, na pinagtibay sa pamamagitan ng 172 affirmative votes at walang isa mang negative vote. Bahagi ito ng magiging susog o amyenda sa Comprehensive Dangerous Drugs Act of 2002 (CDDA) na matagal nang isinusulong hindi lamang ng mga mambabatas kundi maging ng iba’t ibang sektor ng sambayanan na matagal na ring ginigiyagis ng matinding problema sa ipinagbabawal na droga. Naniniwala ako na kailangan nang lubos na malipol ang panganib na inihahasik ng mga user, pusher at drug lords na walang humpay sa pamamayagpag sa mga komunidad; pagpuksa sa naturang kasumpa-sumpang bisyo sa pamamagitan ng pagpapataw ng death penalty.
Totoo na ang nabanggit na panukalangbatas ay nakatuon lamang sa pagsusog sa CDDA hinggil sa pagpapataw ng capital punishment sa mga nag-iingat ng illegal drugs. May mga pahiwatig na hindi na kailangan ang nasabing amyenda sa matuwid na kabi-kabila naman ang napapatay na sugapa sa droga, lalo na kung sila ay nanlalaban sa mga alagad ng batas kapag sila ay nasusukol sa pinagtataguan nilang mga drug den. Gayunman, kailangan ang nabanggit na pagsusog upang lalong tumatag ang ating penal system.
Magkagayon man, naniniwala ako na palalawakin ng mga mambabatas ang pagamyenda sa CDDA at sa iba pang batas upang mapatawan din ng death penalty ang sinumang mahahatulan sa kasong pagpatay, panggagahasa, pagdukot at iba pang karumal-dumal na mga krimen. Sa pagsusulong ng gayong mabigat na parusa, natitiyak kong kabi-kabila ang mga pagtutol, lalo na sa pamunuan ng iba’t ibang religous groups, katulad ng Simbahang Katoliko. Nakaangkla ang nasabing mga pagkontra sa paniwala na Diyos lamang ang maaaring bumawi ng buhay ng kanyang mga nilikha.
Gayunman, lalong tumitindi ang aking paninindigan na lubhang kailangan ang death penalty sa pagpuksa ng kahindikhindik na mga krimen -- buhay ang dapat ipalit sa buhay na inutang, wika nga.