Sulong, Romblon!
ALAM mo ba kung saan matatagpuan ang Romblon? Malamang ay hindi mo batid kung saan ang lokasyon nito dahil ito ay isa sa mga lugar na tila napag-iwanan na ng panahon.
Ang Romblon ay kilala bilang “Marble Capital of the Philippines” dahil maski saan ka lumingon sa lugar ay tiyak na makakakita ka ng tagiliran ng bundok na puno ng
marmol.
Sa kabila ng likas na yaman nito, lalo na sa supply ng marmol, nananatili itong 3rd class municipality sa hanay ng mga siyudad at bayan sa Pilipinas.
Ito ang unang pagkakataon matuntong ko ang Romblon, Romblon. Ang lalawigan ng Romblon ay kinabibilangan ng maliliit na isla kaya hirap ang gobyerno at pribadong sektor na mabigyan ito ng sapat ng supply ng kuryente nitong nakaraang mga dekada.
Kapag nakausap niyo ang mga Romblomano ay sasabihin nila sa inyo na umaga, tanghali at gabi sila ay nakararanas ng brownout.
At kung may supply ng kuryente, nagpafluctuate ito parang blood pressure ng tao.
Ang kakulangan ng supply ng kuryente ang dahilan kung bakit hindi umuusad ang
ekonomiya ng Romblon.
Hanggang ngayon ay wala kayong makikitang sinehan, shopping mall, 3-star hotel, theme park at maging fast food chain sa Romblon.
Tatlong lumang diesel power plant ang lumilikha ng kuryente para sa mga munisipalidad ng lalawigan subalit sa kabila nito, malaki pa rin ang kakulangan ng kuryente doon.
Subalit kamakailan, pumasok ang dalawang higanteng kumpanya – Honda Motor Co. Ltd at Komeihaltec na kapwa nakabase sa Japan – upang tumulong sa paghahanap ng karagdagang supply ng kuryente para sa mga Romblomanos.
Nitong nakaraang dalawang taon, naitayo ng dalawang kumpanya ang tatlong wind turbine na halos kahawig ng mga turbina na makikita sa
Ilocos Norte at Tanay, Rizal.
Sa pakikipagtulungan ng Romblon Electric Cooperative (Romelco), naitayo ang mga higanteng turbine, na kayang lumikha ng 300kW na kuryente. Ang nailikhang kuryente ay isinasama sa kuryenteng mula sa tatlong diesel power plant.
Dahil dito, sobra naman ang supply ng kuryente para sa mga isla ng Romblon.
Upang hindi maaksaya ang mga nalilikhang kuryente, nagdisenyo ang Honda Motor Co. ng mobile battery power pack, na pag-iimbakan ng kuryente.
At ang mga battery power pack na ito ang nagbibigay ng kuryente sa 100 Honda PCX electric scooter na umiikot na sa buong isla gamit ng mga empleyado ng Romelco at residente sa lugar.
Hindi ba hanep ito?