Gen 3:1-8 ● Slm 32 ● Mc 7:31-37
Umalis si Jesus sa lupain ng Tiro at dumaan sa Sidon papunta sa lawa ng Galilea. Pagdating niya sa lupain ng Decapolis, may mga nagdala sa kanya roon ng isang bingi na halos di makapagsalita. At hiniling nila kay Jesus na ipatong dito ang kamay.
Matapos siyang ihiwalay ni Jesus sa mga tao, inilagay niya ang kanyang daliri sa tenga ng tao at dumura at saka hinipo ang kanyang dila. At tumingala siya sa Langit, nagbuntunghininga at sinabi: “Ephphata,” na ang ibig sabihi’y “Buksan.” Nabuksan ang mga tenga ng tao at biglang nakalag ang dila niyang nakabuhol kaya nakapagsalita siya nang tuwid.
PAGSASADIWA:
Tumingala siya sa Langit… at sinabi: “Ephphata,” na ang ibig
sabihi’y “Buksan.”— Ang nakakaawang kalagayan ng taong bingi ay larawan ng masaklap ding kalagayan ng taong hindi pa nakakarinig sa salita ng Diyos, sa Mabuting Balita ni Kristo. Dahil nga hindi siya nakakarinig, hindi rin niya maibabahagi sa iba ang Mabuting Balita. Isipin mo ang pakiramdam ng isang bingi sa gitna ng mga nagkukwentuhang magkakaibigan. Nagkakasayahan, nagbibiruan, at nagtatawanan ang lahat maliban sa bingi dahil hindi naman niya naririnig kung ano ang pinag-uusapan at pinagtatawanan. Ganun din naman, hindi niya masasabi sa iba ang katatawanan dahil hindi nga niya ito narinig.