600M sa mundo, nagkakasakit sa kontaminadong pagkain

ANG mga pagkaing kontaminado ng bacteria, viruses, parasites, at toxic chemicals ay isang umiigting na banta sa kalusugan, at nagdudulot ng problemang pangekonomiya, nabunyag sa isang global conference tungkol sa ligtas na pagkain.

Tinipon ng dalawang araw na forum ang mga opisyal ng pamahalaan at mga health experts mula sa 125 bansa upang matuldukan ang panganib sa hindi ligtas na pagkain, na pumapatay sa mahigit 400,000 katao kada taon, ayon sa taya ng United Nations.

“Today, the world produces enough food for everyone,” sabi ni Jose Graziano Da Silva, director general ng Food and Agriculture Organisation (FAO) ng UN, sa pagbubukas ng kumperensiya nitong Lunes.

Subalit karamihan sa pagkaing ito “is not safe”, dagdag niya.

“We estimate that each year, nearly one person in 10 falls sick after eating contaminated food,” sabi ni Kazuaki Miyagishima, nangangasiwa sa food security department ng World Health Organization (WHO).

Sa 600 milyong katao na nagkasakit dahil sa kontaminadong pagkain, nasa 420,000 sa mga ito ang namamatay, base sa taya ng UN.

Ang mga batang edad lima pababa ang pinakamadalas mapuruhan, binubuo ang 40 porsiyento ng kabuuan ng mga nabiktima.

Ayon sa WHO, kontaminadong pagkain ang sinisisi sa mahigit 200 sakit, mula sa diarrhea hanggang sa cancer—at malaki ang epekto nito sa ekonomiya, pero kadalasang ipinagwawalangbahala lang.

Tinaya ng FAO ang nalulugi sa mga low- at middle-income countries at aabot ito sa $95 billion (P4.96 trilyon) kada taon.

Dinaluhan ng mga ministers at deputy minister mula sa 20 bansa, inaasahang maglalabas ang kumperensiya ng apela para sa mas epektibong ugnayan at suporta kaugnay ng usapin.

“Food safety is a crucial issue for everyone on earth, but it is here in Africa that the impact of the scourge is felt most,” sabi ni AU Commission Chair Moussa Faki.

Ayon kay Miyagishima, kailangan ang iba’t ibang approach para maresolba ang problema.

Kabilang dito ang mas pinaigting na mga batas, pinahusay na pagsasanay at mga equipment, at pinag-ibayong health systems para agarang matukoy ang mga nakaambang panganib, habang epektibong nagpapalitan ng mahahalagang impormasyon ang mga bansa, aniya.

Sari-sari ang nakaambang panganib, mula sa bacteria na tulad ng salmonella o listeria, hanggang sa mga kemikal na gaya ng mga heavy metals na nakapagdudulot ng cancer, at mga organic pollutants.

Disyembre 2018 nang inihayag ng UN ang pagtatakda nito ng World Food Safety Day tuwing Hunyo 7.