Jinggoy, Bong, laglag sa Digong’s list
Kahit na itinaas ni Pangulong Rodrigo Duterte ang kamay ni dating Senator Jinggoy Estrada sa isang pagtitipon nitong nakaraang linggo, hindi kasama ang huli sa kanyang senatorial lineup.
Ito ang nilinaw ni Duterte sa pagsisimula ng kampanya ng mga pambato sa pagka-senedor ng partido niyang PDP-Laban. Kasama sa mga kandidato ng partido ang limang mga miyembro at anim na guest candidates.
Sa isang payam, nilinaw ng Pangulo na binanggit lamang niya si Estrada sa isang okasyon sa Legazpi, Albay nitong nakaraang linggo bilang paggalang.
“Nandoon siya eh. Alangalang naman na hindi ko siya [batiin],”aniya.
Gayunman, si Estrada at dating Sen. Bong Revilla, kapwa inakusahan ng katiwalin kaugnay sa 2013 pork barrel scam, ay bahagi ng Hugpong ng Pagbabago (HNP) slate, ang political party ni presidential daughter Davao City Mayor Sara Duterte-Carpio.
Opisyal na ikinakampanya ni Duterte sina Maguindanao Representative Zajid “Dong” Mangudadatu, dating Philippine National Police (PNP) chief Ronald “Bato” Dela Rosa, dating Special Assistant to the President Bong Go, Senator Koko Pimentel, at dating Political Adviser Francis Tolentino. Sila ay tinatawag na “MABAGO KO TO”.
Samantala, ang guest candidates ng PDP-Laban ay ang reelectionists senators na sina Cynthia Villar, Sonny Angara, at JV Ejercito; Ilocos Norte Governor Imee Marcos; Taguig Representative Pia Cayetano; at singer na si Freddie Aguilar.
NO EXPECTATION
Sinabi naman ni Sen. Grace Poe na hindi siya umaasang ieendorso ni Pangulong Duterte sa May 13 senatorial elections.
Inamin ni Poe, independent candidate, na makatutulong ang endorsement ng Pangulo sa kanyang reelection bid, gayunman iginagalang niya ang choices ng Pangulo.
“Hindi ko ipagkakaila, siyempre ‘pag inendorso ka ng administrasyon, iba ‘yon ‘di ba? Mas makakagaan sana ‘yon para sa aming resources pero hindi ka naman puwedeng mamilit,” ani Poe sa chance interview nitong Huwebes ng Department of Transportation in Manila.
CHOICE NI SARA
Sa kabilang dako, sinabi ng Pangulo na iginagalang niya ang desisyon ng kanyang anak na si Mayor Sara ikinakampanya ang sarili nitong senatorial slate bukod sa kanyang personal bets.
Sa isang anayama sa media, sinabi ni Duterte na may ibang pananaw ang kanyang anak at ayaw niyang makipag-away dito.
“Well, ‘yung -- tayo-tayong paniwala eh, so I cannot stop my daughter from supporting other candidates if that is her desire. Ayaw ko na makipag-away sa kanya,” aniya.
Ikinakampanya ni DuterteCarpio sina Angara, Cayetano, Ejercito, Pimentel, Sen. Cynthia Villar, Mangudadatu, Go, Tolentino, Dela Rosa, Marcos, Estrada, Revilla, at dating reporter na si Jiggy Manicad.