Bakuna vs tigdas, nagbahay-bahay
Sa Maynila sinimulan ng Philippine Red Cross (PRC) ang pagsasagawa ng mass vaccination drive kahapon.
Ayon kay PRC Chairman at Senador Richard Gordon, una silang nagsagawa ng pagbabakuna sa lungsod dahil ito ang itinuturing na hotspot ng outbreak.
Nabatid na sa Corazon Aquino Health Center isinagawa ang pagbabakuna sa mga anim na buwan hanggang limang taong gulang.
Sinabi pa ni Gordon na plano nilang gawin na rin ito nang regular upang makaagapay sa pagbabakuna, lalo na at malaki ang immunization gap na kailangang habulin.
Bukod sa mass vaccination, may 12 health teams na rin ng PRC, na binubuo ng volunteer doctors, nurses, health worker, recorder, logistics assistant, community mobilize, at mga estudyante, na nagbabahay-bahay upang magbakuna.
Nanawagan rin naman si Gordon sa iba’t ibang organisasyon sa bansa, pribado man o pampubliko, na magtulung-tulong upang mapigilan ang pagkalat pa ng sakit.
Pinasalamatan rin naman ni Gordon angmga magulang na tumugon sa kanilang panawagan na magpabakuna upang maprotektahan ang kanilang mga anak laban sa banta ng tigdas.
Bukod naman sa mass vaccination, namigay na rin ng hotmeals ang PRC sa mga magulang at mga batang nakiisa sa vaccination program, at pinangunahan mismo ito ng senador.
Una nang nagbukas ang PRC ng Measles Care Unit sa San Lazaro Hospital, at nagbubukas ng mga katulad pa nito sa iba pang mga ospital.