Senior citizens, bigyan ng trabaho
Patuloy na isinusulong ni dating Presidential Political Adviser Francis Tolentino ang oportunidad sa trabaho para sa mga senior citizens na nais at may kakayahan pang makapaghanapbuhay.
Ito ay kaugnay ng nakabimbing panukala na magpapababa sa retirement age sa 56 mula sa umiiral na 60 anyos.
Para kay Tolentino, hindi dapat maging hadlang ang edad para makapaghanapbuhay ang mga senior citizens, lalo na kung malakas at may kakayahan pa sila.
“May mga kababayan po tayo na bagamat senior citizen na ay tuloy ang pagbabatak ng buto para matustusan ang pangangailangan ng kanilang mga pamilya,” ani Tolentino.
Dagdag pa ni Tolentino, mas maraming karanasan ang mga senior citizens na maaari nilang ibahagi sa mas batang empleyado.