Duterte sa TESDA: Magsanay ng mas maraming manggagawa
Ipinag-utos ni Pangulong Duterte sa Technical Education and Skills Development Authority (TESDA) na magsanay ng mas marami pang manggagawa sa linya ng konstruksiyon para sa “Build, Build, Build” program ng administrasyon, ayon sa Malacañang.
Ito ang ipinahayag ni Presidential Spokesperson Salvador Panelo nang aminin ni Duterte na mayroong pagkaantala sa infrastructure program ng pamahalaan dahil sa kakulangan ng mga manggagawa.
Ayon kay Panelo, ipinag-utos ni Duterte kay TESDA chief Isidro Lapeña na aksiyunan ang problema.
“Kasi, we are lacking in experts in... like in carpentry, in welding, iyong mga technical, kulang eh. Marami po tayong mga taong hindi empleyado, whether sa gobyerno o sa kumpanya, kasi hindi naman sila qualified. Lalo na iyong mga vocational, lalo na sa construction,” aniya.
“Kaya sabi ni Presidente, sa TESDA, aba kailangan para magkaroon tayo ng malalim na bench ng mga karpentero, ng mga welders, mga electricians, kasi marami ang nagpuntahan sa iba’t-ibang bansa eh,” dagdag niya.
“In other words, we are doing something about it. That is the response,” aniya pa.
Base sa “Build, Build, Build” website, mayroong 25,330 bakanteng posisyon, karamihan ay karpintero, pipe fitters, rebarman, steelman, laborers, welders, scaffolders, foremen, painters, at skilled electricians.
Nitong Huwebes ng gabi, sinabi ni Duterte na ang “Build, Build, Build” program ay bahagyang naaantala.
“Alam mo dito sa Pilipinas ngayon maraming trabaho. Ang construction humihinto kaso walang trabahante. Sino yan? Master electrician, master carpenter, master planner. Papag-aralan mo yan. Ang karamihan ng may alam niyan wala na sa Pilipinas at nandoon na sa Middle East,” aniya.
“Kaya ‘yang ‘Build, Build, Build’ medyo atrasado nang konti, walang trabahante. Marami tayong Pilipino, kung hindi naman tayo magtulungan, eh ‘di wala,” dagdag niya.
Kalaunan ay ipinayo niya sa mga miyembro ng New People’s Army (NPA) na mag-aral sa ilalim ng Technical Education and Skills Development Authority (TESDA).
“Doon (TESDA) kayo mag-aral, bayaran ko kayo hanggang makagraduate kayo. All you have to do is to drop your weapon. Wala na akong... pinatay mo. Wala akong magtanong na anong barangay pinuntahan mo,” sabi ng Pangulo.