PNR Tutuban-Manila, ginagawa na
Sinimulan na sa wakas nitong Biyernes ang konstruksiyon ng Tutuban-Malolos phase ng Philippine National Railway (PNR) NorthSouth Railway sa Malolos City, Bulacan, at inaasahang makukumpleto sa 2021. Ayon kay Bulacan Gov. Wilhelmino M. Sy Alvarado, dahil sa 37.6-kilometrong mass railway transportation, tiyak nang mapaiikli ang biyahe sa pagitan ng Maynila at Bulacan, at mula sa kasalukuyang mahigit isa at kalahating oras at magiging 30-35 minuto na lang, para sa hanggang 300,000 pasahero araw-araw. Sinabi pa ng gobernador na may kabuuang 10 istasyon sa alignment project na itatayo sa Tutuban, Solis, Caloocan, Valenzuela, Meycauayan, Marilao, Bocaue, Balagtas, Guiguinto, at Malolos.