2 drug pusher, customer pinosasan

Kalaboso ang dalawa umanong tulak ng ilegal na droga at kanilang 18-anyos na customer sa buybust operation sa Marikina City, kahapon.

Kinilala ang mga suspek na sina Lionel Bautista, alyas Bugoy, 32; Comemoracion Cruz, alyas Maurin, 44; at Maria Angelica Murillo, alyas Jelay, 18. Pawang ng Barangay Nangka, Marikina City.

Sa imbestigasyon, nagsagawa ng buy-bust operation ang mga miyembro ng Station Drug Enforcement Unit laban kay Bugoy, na kalaunan ay kinilalang si Bautista, sa loob ng bahay ni Murillo, dakong 1:00 ng madaling araw.

Nag-ugat ang operasyon sa ulat hinggil sa umano’y pagkakasangkot ni Bautista sa ilegal na aktibidad sa lugar.

Sa police report, nakabili ang poseur-buyer ng isang pakete ng ilegal na drogas, na nagkakahalaga ng P500, kina Bautista at Cruz.

Matapos ang transaksiyon, sinabi ng awtoridad na inaresto ng antinarcotics team ang dalawa, gayundin si Murillo na bumili ng ilegal na droga sa mga suspek.

Nasamsam sa operasyon ang limang pakete ng hinihinalang shabu, P150 cash, walang laman na gum canister at ang marked money.

Nakakulong ang tatlo at kakasuhan sa paglabag sa RA 9165 (Comprehensive Dangerous Drugs Act of 2002).