Trike driver, utas sa gunman

Isang 30-anyos na driver ang pinagbabaril ng hindi pa nakikilalang armado habang sakay sa kanyang tricycle sa Quezon City, nitong Biyernes ng umaga.

Kinilala ni Supt. Joel Villanueva, hepe ng Quezon City Police Station 6, ang biktima na si Wilson De Guzman, ng Barangay Pasong Tamo, Quezon City.

Ayon sa isang saksi, nasa loob siya ng kanilang bahay na ilang metro ang layo sa pinangyarihan sa Capas Street malapit sa corner AFP St., sa Bgy. Holy Spirit, dakong 5:40 ng madaling araw.

Makalipas ang ilang sandali, nakarinig siya ng dalawang putok ng baril kaya nagtago.

Nang sumilip siya sa kanilang bintana, nakita niyang duguan si De Guzman.

Sa inisyal na imbestigasyon, si De Guzman ay sakay sa kanyang motorsiklo (UZ8-200), na may orange sidecar at body markings Luzon Toda 631, nang pagbabarilin ng hindi pa nakikilalang suspek.

May tama ng bala sa ulo at kanang bahagi ng katawan si De Guzman, na naging sanhi ng agaran niyang pagkamatay.

Inaalam na ng awtoridad ang motibo sa insidente.