Misal, hataw sa Flexible Cup Int’l Table Tennis
GINAPI ng Team Joola, sa pangunguna ni dating UAAP star John Russell Misal, ang University of Santo Tomas Team B, 3-0, sa Men’s Open team event nitong Biyernes sa pagsisimula ng 9th Flexible Cup International Table Tennis Championships sa Harrison Plaza Activity Center sa Malate, Manila.
Kipkip ang karanasan sa matikas na kampanya sa World Championship of PingPong sa London kung saan umabot siya sa Round-of-16, pinatob ni Misal si Nico Nayre, 11-7, 11-9, 11-9 sa first matchm habang ginapi ni Chen Lei Xin si Reymart Mabuang, 11-2, 11-4, 11-5 sa second match. Kinumpleto ni Alexis Bolante ang sweep ng Team Joola sa 11-6, 11-4, 11-6 panalo kay Carl Victorio,
“Matagal na kaming naglalaro ni Nico, patas lang kami, medyo napaganda lang ang gising ko,” pahayag ni Misal, UAAP Rookie of the Year (2013) at Most Valuable Player (2017) nang gabayan ang National University.
“Maraming magagaling, pero pipilitin kong makuha ang gold medal at magchampion dito,” sambit ni Misal, nakalinya ring lumaro sa men’s single Open event.
Napukaw ni Misal ang atensyon ng international table tennis community nang gapiin ng pambato ng Toril, Davao City, ang pamosong local player na si Ashley Stokes para makausad sa Round-of-16 sa prestihiyosong World Championship of Pingpong na ginanap nitong Enero 2630 sa London. Bahagi siya ng Philippine delegation sa Sports Exchange program ng Table Tennis Associationfor National Development (TATAND) sa Beijing at nagsanay sa Shengdeng, China sa nakalipas na taon.
Kabilang din sa Joola team sina Jong Ortalla at Charlie Lim, honorary president (TATAND), ang organizer ng torneo na pagtataguyod ng Flexible Packaging Corporation.
Bukod sa Team Joola at UST-2, kasama nila sa Group C ang Malaysia at Fleet Marine. Indonesia, Philippine Army, Baker Studio and TrudelUST ay nasa Group A, habang ang University of Taipei, Green Paddle, UST-1 at Omila Sports Academy ay nasa Group B at magkakasama sa Group D ang Chinese Taipei, Hua Ching, Crime Lab-Altruists at Jade Dragon.
Ang mangungunang dalawang koponan sa bawat grupo ay uusad sa second stage ng torneo na may nakalaang P50,000 para sa overall team champion at P10,000 sa men's and women's singles champions.
Mahigit 400 players ang sumabak sa torneo na may events na high school, collegiate at Open divisions. Ang mga mangungunang players sa individual event ay mabibigyan ng pagkakataon na makasama sa TATAND delegation para sa sports exchange program sa China.