MAGSASAKA, PAANONA?
‘Di sila pababayaan, tutulungan sila—DTI chief
Iginiit ng Department of Trade and Industry na walang talo ang magsasaka sa Rice Tariffication Act na nilagdaan ni Pangulong Rodrigo Duterte nitong Biyernes.
Ito ang sagot ni DTI Secretary Ramon Lopez sa mga batikos na hindi maganda ang epekto ng batas sa mga magsasaka sa bansa.
Ayon kay Lopez, hindi malulugi ang mga magsasaka sa RTA dahil tutulungan silang makipagsabayan sa mga importer ng bigas.
“Hindi naman po sila pababayaan, tutulungan din sila para makasabay, bumaba ang cost, tumaas ang kanilang productivity. Tuyulungan sila sa pondo, sa fertilizer, sa irrigation sa tubig, sa financing nila at sa iba pang mechanism para may mga equipment sila para makalaban sila at dumami ang supply,” paglilinaw ni Lopez.
Sa ilalim ng RTA, kahit sino ay maaaring mag-angkat ng bigas basta’t magbayad lamang ng 35 porsiyentong taripa.
Idiniin din ni Lopez na hindi sasadsad ang presyo ng bigas dahil sa RTA. “Hindi mangyayari yung sobra sobrang pagbaba ng presyo dahil malulugi naman ang nag-import kasi kapag nangyari ‘yan ay titigil naman sila mag-import kaya ang mangyayari ay dapat magbalanse na,” aniya.
Ikinatuwa ni Speaker Gloria Macapagal-Arroyo ang paglalagda ng Pangulo sa Rice Tarrification Act at hiniling ang lubusang pagpapatupad nito, binanggit na makatutulong ito para maibsan ang inflation.
“Now we can focus on its proper implementation so that everyone can and should benefit from the law,” ani Arroyo, kahapon
Sumang-ayon dito si Camarines Sur Rep. Luis Raymund Villafuerte, co-author ng RTA.
“Rice tariffication will benefit poor households the most, given that rice accounts for 20 percent of their consumption,” aniya
Ngunit labis na nababahala si Bayan Muna partylist Rep. Carlos Isagani Zarate bagong batas na aniya ay magiging death warrant sa agrikultura ng bansa.
“With the rice tariffication, the rice cartels can tighten their hold on the price of rice as well as the supply. Ang mangyayari sa presyo ng bigas ay matutulad sa presyuhan ng langis na parating tumataas depende sa international market dahil mas doon nakasalalay ang supply,” aniya.
Idiniin niya na ang rice cartel at ang foreign rice suppliers lamang ang makikinabang sa RTA.
DEATH SENTENCE
Sinabi ng isang grupo ng mga magsasaka na ang RTA ay magbibigay-daan sa walang prenong rice importation at pagtaas ng presyo ng bigas.
Ayon sa Kilusang Magbubukid ng Pilipinas (KMP), ang Act ay katumbas ng death sentence para sa local rice industry at mga magsasaka.
Idinagdag nito, na direktang maapektuhan ng batas ang 13.5 milyong magsasaka ng palay at kanilang mga pamilya, 17.5M manggagawa sa bukid, at mahigit 10 milyong Pilipino na umaasa sa NFA rice, 20,000 rice retailers at 55,000 rice mill workers.
“It’s the beginning of the end of the local rice industry. Even with the rice industry enhancement fund, the local rice industry do not stand a chance with massive rice imports,” diin ni KMP chairperson Danilo Ramos.
Tinawag din ng Migrante International, samahan ng overseas Filipino workers, na “death sentence to the local rice industry’’ ang paglagda ni Pangulong Duterte sa rice tarrif bill.
Samantala, hinimok ni dating Senate President Juan Ponce Enrile ang gobyerno na maghanda sa magiging epekto ng rice tarrification law sa mga lokal na magsasaka, nagbabala na ng “over supply” ng bigay ay labis makakaapekto sa kanila.
“If you bring in too much commodity from the outside, you deprive local farmers of their source of livelihood, so we should be using tariffs to protect them,” paliwanag ni Enrile sa isang panayam.