2 African, tiklo sa pekeng Canadian visa
Dinampot ng mga tauhan ng Bureau of Immigration (BI) ang dalawang African na kamakailan ay tinangkang pumasok at lisanin ang bansa para sa Canada gamit ang mga pekeng Canadian visa.
Inimpormahan ni BI port operations chief Grifton Medina si Immigration Commissioner Jaime Morente na ang mga African ay magkahiwalay na inaresto sa NAIA Terminal 1, ng mga miyembro ng travel control and enforcement unit (TCEU) ng tanggapan.
Sinabi ni Medina na ang dalawang African ang pinakabagong naaresto sa pinaigting na kampanya laban sa mga dayuhang sindikato na ginagamit ang Maynila bilang jump-off point sa pagpapadala ng mga ilegal na tao sa Canada.
“We are warning these syndicates to stop their nefarious activities because our men at the airports are experts in detecting fraudulent visas and passports,” sabi ni Medina.
Kasalukuyang nakakulong ang mga African sa tanggapan habang inaasikaso ang aksiyon sa paglabag sa immigration act.
Kinilala ni BI TCEU chief Erwin Ortañez ang dalawa na isang Cameroonian Etienne Makang Nformem, 35; at Sudanese na si Abdelmotalab Idris Himat Mohamed, 29.
Ayon kay Ortañez, dinampot si Nformem nang dumating siya sakay sa Gulf Air flight mula Bahrain nitong Pebrero 9.
Sa panayam, sinabi umano niya na bibisitahin niya ang kanyang pinsan dito at pagkalipas ng tatlong araw ay lilipad pa-Toronto.
Inaresto naman si Mohamed nang paalis na siya patungong Toronto sakay sa Philippine Airlines flight nitong Pebrero 13.
Maging ang kanyang Canadian visa ay nadiskubreng peke nang inspeksiyunin ng tauhan ng antifraud division ng BI.
Siya ay iniulat na nagtatrabaho sa Pilipinas noon, at ipinadala umano ang kanyang pasaporte sa Sudan upang maproseso ng kanyang pamilya ang kanyang pekeng Canadian visa.