Hinataw ng bato sa ulo, dedo

Hindi na nakauwi nang buhay ang isang karpintero, na nagpaalam sa kanyang katrabaho na bibili lang ng pagkain sa tindahan, makaraang hatawin ng bato sa ulo ng hindi nakilalang salarin sa Tondo, Maynila, nitong Linggo.

Bangkay na si Marlou Balena, nasa 40-49-anyos, ng Barrio Maasim, San Ildefonso, Bulacan, nang madiskubre ng ilang concerned citizen, at may tatlong malalaking sugat sa ulo.

Inaalam na ng pulisya ang pagkakakilanlan ng suspek, na tumakas matapos ang krimen.

Batay sa imbestigasyon ni SPO2 Jonathan Bautista, ng Manila Police District (MPD)- Crimes Against Persons Investigation Section (CAPIS), dakong 6:20 ng umaga nang madiskubre ang bangkay ni Balena sa tapat ng isang nakaparadang truck sa Magallanes Street, Manila North Harbour Centre sa Vitas.

Huli umanong nakitang buhay si Balena nang magpaalam sa kasamahang si Leoncio Morte na bibili lang ng pagkain sa tindahan, dakong 11:00 ng gabi.

Gayunman, hindi na nakabalik ang biktima hanggang sa matagpuan na lang itong malamig na bangkay.

Masusi namang iniimbestigahan ng mga awtoridad kung sino ang posibleng may kagagawan sa krimen, at ang motibo sa pagpatay.